*****          وه ره سو          *****

‍ ─┅─═इई 🌸🌺🌸ईइ═─┅


ژن و ژیان

خودا لە ئەزەڵ لە دەورەێ وەرین
لە یاقووت و زەڕ لە چینی لە چین

فرێشتەێ لە ناو بەهیشت بەرین
کرد وە شیەریک ئاێەم لە زەمین

خوەش بوو چۊ چەوێر خوەش ئەنام چۊ نەێ
دۊەت وەهارەو گوڵباخیەو بەی

داێم ها هۊر گەرمی ژیانێ
خەمەیل عالەم گرێ ئەو شانێ

یەێ گڕ ئاگر ساج کوانێە
یەێ گڕ ستۊن گەوراێ خانێە

دەرۊنێ وەهار دڵێ دەلیاسە
خوەشاڵ وەو مڵکە ژن پاتشاسە

جامەک زنەێ تریوەێ ئاوە
دارە سەونزەگەێ ناو خوەرە تاوە

نەزەرکەردەگەێ پاێ داڵاهووە
سفێ وەفرەگەێ قوڵەێ شاهووە

بەڕەزاێ تاش سەرنسارانە
سەونزی چیمەنەیل چۊزەێ دارانە

ڕا یەکێ داڵگ ڕا یەکێ لەیلە
پەناێ بێ کەسی مەلۊچگەیلە

ڕا ێەکێ خوەێشکە ڕا یەکێ براس
ژیان لە ئەزەڵ وە ناو ژن نریاس

فەرهاێ ڕا ژنێ بێستۋن ڕمان
یەێ دەس شەو دێز سان ئەۋ شکان

مەجنۊن ڕا ژنێ سەر نا بیاوان
خەسرەو پەێ ژنێ سەر دا وە تاوان

شاعرێ ژنێ کردەێ وە ناو دار
بۊ وە فەردەوسی گەوراێ ڕووژگار

ژن هەم تاج زەڕ ژن هەم ژیانە
ڕا کەویر دڵ نەرمە وارانە

لە وێنەێ کەڵ مەس لە ناو خەزانەو
مزگانی وەهار دەی وە باوانەو

لە کوانێ زنەی سزیەێ تا وەسوو
چۊ دان ئەسپەن بوودە پەتەسوو

ژن هۊرێ ها وە گوڵ و گوڵدانەو
کەویرەیل کەێ وە باخ و بووسانەو

ئەگەر بوودنە پاتشاێ جەهان
کەسێ نیەمینیەی لە سۊک زندان

زندە وە گووڕ کەێ هەر چێ تفەنگە
کەس وە چەو نیەۊنێ ئەو کوومەێ نەنگە

ئرمس نێە ڕشیەی لە دیدەێ دارێ
شەماڵ چاو مەرگ کەسێ دی نیارێ

کەس پێا نیەکەی خوف نانێ بوو
یا چرچەێ دەردێ لە ناو گیانێ بوو

خوەێ خەوەر دێرێ لە دەرد و لە داخ
لە گەرمەشین و لە ئرمس و ئاخ

خوەێ خەوەر دێرێ لە جەرگ داڵگ
لە نەخفتن و لە مەرگ داڵگ

نیەیلێ لە دونیا دی شوون جەنگ بوو
کەسێ بکوشیەێ تەقەێ تفەنگ بوو

نیەیلێ ساچمەێ بەێ لە ناو چەوێ
یا خۊن قوڵپە بەێ لە ناو وەرقەوی

کەسێ دار بیەن وەر جە گوڵ سوو
داخێ تا ئەبەد لە هۋرەو نەچوو

نیەیلێ بسزیەێ دی جەرگ کەسێ
یا خەوەر بارن لە مەرگ کەسێ

ژن وێنەێ شەو بوو وەنەوشەو یاسە
هاوساێ مانگ و خوەر دەلیاێ ئێحساسە


✍ "جـــەلال کــووهـــی"


👇👇👇👇👇👇👇👇👇

https://t.me/joinchat/Pg6bbMv_Mvye5koJ

─┅─═इई 🌸🌺🌸ईइ═─┅─

‍ ─┅─═इई 🌸🌺🌸ईइ═─┅

" وەهــار ئــومــێــد "

یـەێ ڕووژ دووارە گـوڵ دەێ
پـەڵـەیـل وشـک دارە
بـوودە بـەهـەیـشـت هـەف ڕەنـگ
ئـی دەیـشـت پـڕ لـە خـارە

نـقـڵ و نـەوات واران
بـەش کـەن لـەێ گـەرمـەسـێـرە
بـڕ بـڕ لـەنـوو ئـەورەگـان
دیـوڵ کـوتـن دووارە

دەنـگ قـولـپـە قـولـپ ئـاوێ
چـۊ لاوە لاوە دایـەێ
ڕەسـێ وە گـووش داران
لـە ژێـر ئـەو مـەغـارە

شـەوێ ئـاگـر کـەنـەو هـەم
ئـەو کـاولێەی لـە تـا سـوو
سـاز خـوەشـی ژەنـن دی
لـەێ مـەخـمـەڵ وەهــارە

چـووپـی کـیـشـن وە شـادی
فـەتـاێ چـەرخـن وە دەورەو
ژن و پـیـاێ حـەڵـقـە دەن
چـۊ مـانـگ و چـۊ هـسارە

گـرمـەێ گـلالـەیـل تـیـەی دەو
ئـاو هـەم کـەفـێدەو گـەنـگیـر
کـاوەێ ئـومـێـدێ کـوشـێ
زەهـاک ئـی شـەوارە

ئـی زوڵـم و جـەورە هـەێ دڵ
تـا سـەر نـیـەمـینـێ وە کـەس
دڵ تـەنـگ مـەکـە لـە بـازی
ئـی چـەرخ ڕووژگارە

✍ "جـــەلال کـــووهـــی"

👇👇👇👇👇👇👇👇👇👇👇

https://t.me/joinchat/Pg6bbMv_Mvye5koJ


─┅─═इई 🌸🌺🌸ईइ═─┅─

‍ " بازنشستە "


لە ساێ دیوارێ وە بێ کەس کەفتۋ
قامەتێ وێنەێ چارەگەێ چەفتۋ

یەێ جفتێ کەوش کۊەنە لە لاێ بۊ
دو جووراوو کوونا لە هەر دو پاێ بۊ

دڵنگەیلێ کوت کوت دەم بێ دگانۊ
خوەێ وێنەێ مەجنۊن لە بێاوانۊ

چێمەو نزیکێ لێ پرسیم خاسی؟
چەوێ ڕیپووک دا دی کەس نەناسی

وەت خاسی هاکوو لە ئی زەمانە
دەس ڕا هەر چێ بەی خۊن گرانە

نزرە داۋ وە ژان هەم ڕووژ و هەم شەو
وەت یە سێ مانگە گووشت نەی مە وە چەو

نیەزانم مامر دی تامێ چۊنە
هەر چگ ئاش کەیمن وشک و بێ ڕۊنە

یخچاڵم خالی جوور دەمم چووڵە
ژان سەد ساڵە ها لەێ کەپووڵە

لە پاێ دیوارێ وە بێ کەس نیشم
سیکار بەهمەن یا گەر زەڕ کیشم

خوسەێ دڵ وە ئی سیکارە دەرکەم
لە وێنەێ سیکار تا وە سوو سزیەم

م لە بوو کەواو لە کوانێ کەفم
شەو تا وەرە سوو ساتێ نیەخەفم

ساڵ وە ساڵ بەتر ڕووژ وە ڕووژ گەنم
وەختە یەێ قەورێ ڕا خوەم بکەنم

گورگ گرانی دی کار خوەێ کرد
هەر چێ داشتیمن گشتێ وەلا برد

یەسە گرانێ هازە لیمان سەن
نە چای دیریم و نە پلووکێ قەن

نە ڕۊن دیریم و نە سێف و پیاز
ئۊشن وە خواردن لە یەێ تاق بساز

خوەێان ئاش و گووشت لە ناو هتڵ خوەن
هە وە هە واوە ڕەفت ئامەد کەن

بوو عەترێان چوو کۋچە وە کۊچە
ئۊشنە ئیمە ئی دونیا هۊچە

بیمەی کفن و دەفن ڕادان جوور کەیمن
قەوردان لە جاێ با فەرهەنگ نەیمن

حقووقم بەس دا ڕووژە ڕووڵە
ڕا یەسه دەمم جوور هشکەفت چوولە

چەوم تەم و تار دنیام بێ سووە
لە ورسی ماڵم هەر برا ڕووە

کەس نیەکەێ فکر بازنشستەێ کوور
نە نمایندە و نە ڕییس جمبور

ئەۊ ڕا خوەێ بێ خەم یانیش هە گەردن
یەک لە یەک بەتر گشتێ بێ دەردن

شاسی بڵێن و دنا سووارن
خوەێان هە ئۊشن دی دەس وە کارن

وەتم هەێ خاڵوو بازنشستەێ پیر
بێ دەس و بێ کەس داێم هە دڵگیر

ئفاقە نیەکەێ کەسێ ڕا ئیمە
درووزن فرە وە چەوم دیمە

لە ڕووژ ڕووشن یانە دەکەڵ بەن
دزەیل خود ماڵ داێم خارەت کەن

تا ئی دارەسە هە ئی مارەسە
بازنشستەیل گرفتارەسە

نە پۊل دەوا نە دەرمان دێرن
گشتێ شەل و کوور لە زنەی سێرن

داد ئەو کی بوەیم ئاێەمێ ها کوو؟
هناێ دادمان وە لاێ کەس نیەچوو


✍" جـــەلال کـــووهـــی

👇👇👇👇👇👇👇👇👇👇


لینک کانال تمام شعرهایم

https://t.me/joinchat/Pg6bbMv_Mvye5koJ

‍ ‍
" زمـــســــان "

دلـم دڵـگـیـر و سـەر بـێ سـامـانـە
لـە ئـێ کـەو تـووفـە لـە ئـی زمـسـانـە

لـەێ چارەێ چەفتە لـەێ دەرد و ژانـە
لـەێ قـەور بـێ بـن لـە ئـی زنـدانـە

لـە ئـێ تـیـەریـکـی دنـیـاێ بـێ نـۊرە
لـەێ کـووس کـەفـتـێ ڕووژەیـل دۊرە

لـەێ داخ هـەر شـەو مـیـنـگە نـووارە
لـەێ زچـەێ خـۊن پـەلـوەچ دارە

لـەێ بـاخ بـڕیـاێ دار بـێ بـەرە
لـەێ خـەڕگ خـەسـە دایـم هـاێ سـەرە

لـەێ چـەم وشـک و کـیـەنـی بـێ ئـاوە
لـەێ ئـەور سـیـەێ نـاو خـوەرەتـاوە

لـەێ لـۊلـەێ گـورگ و شـوون کـەمـتـارە
لـەێ سـووم سـەردە هـاێ دیـەکـەو شـارە

لـەێ گـوومـا بـۊن و دەم ئـەڵ پـێـچـانـە
لـەێ چـزەێ دەردە هـا لـەێ سـقـانـە

لـە ئـی کـەفـتـنـە لـە ئـی لـەرزیـنـە
لـەێ شـوون شـەڕە هـاێ سەرزەمـیـنـە

لـەێ وەفـر سـیـە لـەێ وەفـر کـەوە
لـە ئـێ دەێ دامـە شـوونـێ هـاێ شـەوە

ئـەر خـودا ڕاسـە گـشـتـێ پیـریـمـن
لـە دەس زمـسـان دی دلـگیـریـمـن

زمـسـان کووتـا بـەو لـەێ شـەلاخ دانـە
لـەێ تیخ هـەڕەێ لـە نـاو بـاخ نـانـە

لـەێ تـۊکـە تـۊک نـەهـاتـە بـووسـەو
لەێ سم کوو هەر شەو وڵاتە بووسەو

بـچـوو ئـەر چـشـتـێ هـەس بـوە ولا
وا وزارد کـەم وە سـەێ عـەڤـدلا

تـا کـەێ ڕێ بـەسـی لـە ئـی وەهـارە؟
زوور سـاێـەقـەد تـا کـەێ وە کـارە؟

تـا کـەێ دڵـتـەنـگـی وە تـەنـیـا بـەسـە
پـرچ لـە خـۊن ڕەنـگ بـەڕەزا بـەسـە

دەس بـکـیـش لـەێـرە سـەردی تـا وە کـەێ؟
زەلان و زقـم زەردی تـا وە کـەێ؟

خـوەزەو بـێ خـەوەر لـەنـوو خـوەر ئـڵاێ
تـرۊسـکـەێ لـە نـاو شـەش کـەلانـا بـاێ

شـوون پـاد بـووڕێ لـە بـاخ و لـە دەیـشـت
سـووم سـاێـەقـەد لـە لـیـمـان دی نـەیـشـت

شـووند بـکـردا وە شـوون شـاهـان
نـاود گـوم بـۊا جـەهـان تـا جـەهـان

تـا سـاز خـوەشـی بـژەنـیـان لـە دۊر
تـا زوڵـم و جـەورد نـەمـەنـیـا لـە هـۊر

تـا لـەو سـەر پـەچـیـە ئـەڵ پـەڕیـم تـا سـوو
حـەڵـقـە بـوەسـیـمـن تـا وە ڕووژ نـوو

ژنـەیـل چـووپـی کـیـش پـیـایـل هـوورە چـڕ
شـاواز بـکـیـشن وە سـاز کـەڵـڕ

دەسـمـاڵ خـڕ بـێـەیـم وە ئـاسـمـانـەو
شـادی بـەش بـکـەیـم لـە سـەر کـاوانـەو

کـیـەنـی بـتـووقـێ گـەنـگـیـر گـرمـەێ بـاێ
واران تـا وە سـوو هـە دەنـگ خـرمەێ بـاێ

✍جـــەلال کــووهـــی

👇👇👇👇👇👇👇👇

لینک کانال تمام شعرهایم

https://t.me/joinchat/Pg6bbMv_Mvye5koJ

ئەێ شێوە ۆێنەێ مانگ و خوەر
باخ چەویر پڕ لە بەر
شازاێەگەێ زەرین کەمەر
بەو دی بنیش کەم بۊش بچم

ئەێ سەوڵ سەونز سەر سراو
لریپەێ مانگ لە قاپ ئاو
جام زەڕین پڕ شەراو
بەو دی بنیش کەم بۊش بچم

ئەێ مەس لە واێ نەسیم شەو
فرشتەێ ئاسمان کەو
خەزاڵەگەێ چەوەیل لە خەو
بەو دی بنیش کەم بۊش بچم

ئەێ دار بەرز سەر نساڕ
شێعر و شەراو فەسڵ وەهار
شیرینەگەێ ناو دیشت و شار
بەو دی بنیش کەم بۊش بچم

ئەێ باخ سەونز سەرکیەنی
مانگ و هسارەێ گوڵ وەنی
وەهار تێەێ دەو هناێ خەنی
بەو دی بنیش کەم بۊش بچم

خەزاڵ تەنیاێ شاهووم
وەفر قوڵەێ داڵاهووم
سرۆەێ نەسیمەگەی سووم
بەو دی بنیش کەم بۊش بچم

بەورەو دەسد بەێ وە دەسم
لە عەتر گیسەیلد مەسم
ئەر تو بچید م بێ کەسم
بەو دی بنیش کەم بۊش بچم

✍ "جەلال کووهی 

🍃
🌸
🍃🍁
🌸🍂🍁
💐‌🌹🍂🍁
🌺🍃🌸🍃🌸🍃

بێ خەێاڵ لە زام تەور و تێشگیم

بێستونیم و دەماوەنیمن

بنچینەێ دژمن لە بیخ کەنیمن

م کورد کەڵهووڕ تو جاف و سووران

سنەی سەردەشتی یا لەک و گووران

گشتێمان وێنەێ ڕووح و گیانیمن

لە بەێن خوەمان فەرق نیەزانیمن

✍ "جەلال کووهی "

🍃
🌸
🍃🍁
🌸🍂🍁
💐‌🌹🍂🍁
🌺🍃🌸🍃🌸🍃

پێشکەش ۈە ڕووح گەوراێ فردەوسی ئیڵام
"وەلی موحەمەد ئومیدی "
وە تەمام شێرەکوڕەیلێ ک لە مەێمگ کوشیان.

٭٭٭ مەێمگ ٭٭٭

سەڵام "دەماوەن" ناو سەرزەمینم
میلکان کوڕەیل لە خۊن ڕەنگینم

سەڵام" بێستۊن" بەرز خەێاڵم
زمگەێ عەشاێر جی کوردە ماڵم

"داڵاهوو" قامەت داێم سەربەرزم
"دیوار چین" چنیاێ لە مەرزم

سەنگەر سەخت ڕووژ نەبەردم
میلکان ئیل و ساڕێژ دەردم

هاوڕاز هورەێ شەوەیل تەنیاێ
بالا بەرزەگەێ وە بێ کەس مەنیاێ

خوەشی ڕووژەیل مینگە نووارم
جی ماڵەکین پار و پێرارم

جی دلاوەری ڕووسەم ڕەنگەیلم
کۊەێ سەربەرز ڕووژ جەنگەیلم

تاش بڵێند ڕا ها وە خۊنەو؟
جوورشوون فەرهاێ ناو بێستۊنەو

دارەیلد دڵ ڕیش کامین نامەردن؟
هەر کام کتاوێ لە ژان و دەردن

سەنگەرد شوون کامین سەردارە؟
گل زەخم گیانێ لە دۊر دیارە

زلف خەێاڵد ڕا پەریشانە؟
گوڵەێ کام دژمن داێە لەو گیانە؟؟

ئەور چەوەیلد پەێ کی وارانە؟
کام شێرە کوڕەیل لە لاد کوشیانە؟

سانەیلد ئڕا بێ دەنگ و سەردن؟
مەلەیل تەنیاد لە پەێ کی گەردن؟؟

باڵای بڵێند ئڕا خەم داێە؟
کام دژمن قەدەم لە خاکد ناێە؟

هاتەو دەنگ "مەێمگ" وەو لێو زەردەو
وەوە گیان کوت وت وەو هەمگە دەردەو

وەت : ئەر ڕووژەیلم سیەس جوور شامە
پەێ کووچ یاران سیا پووشامە

هەر ۆژەێ خاکم خۊنێ ڕشێاێە
ێەێ شێرە کوڕێ لەێرە کوشیاێە

لە پاێ هەر سانێ شێرێ خەفتێە
ێا گەر سەردارێ بێ سەر کەفتێە

باسی هاتەو جی جوور باد خەزان
پەڵ پوو دارم وە ساتێ ڕزان

داێەم وە دەم گولەێ "ڕەشاشەو"
جوور تەگر واری لە بەرزی تاشەو

بنووڕ وە دارم بنووڕ وە بەرگم
پەێ کووچ یاران رازی وە مەرگم

ڕا ئەو شێرەێل بڕنەو وەدەسە
ئەو عەشاێر لە خۊن سەر مەسە

خۊنێان ڕشیاس لەێ سەرزەمینە
شەوارم تا ڕووژ گشت گەرمەشینە

ئێ بەرزی تاش لە خۊن گوڵ گوڵە
ماواێ دەلیری ئێڵ "خزڵە"

ها هۊرم ڕمەێ بڕنەو دەسێان
ئاخڵەێ ئرمس لە چەو مەسێان

ها هۊرم گشتێ وە پاوە کوشیان
مشتێ لە خاکم وە دژمن نێان

ێە سە مەنمە وە حال زارەو
وێنەێ یەێ پیرێ لە پەڕ شارەو

هەر چەن م نووڕم وە دەور خومەو
سفرەێ دڵتەنگیم ڕا کی بخەمەو؟؟

ێە سە بێ هاودەنگ یەسە دڵگیرم
لە پاێ ئێ مەرزە هەر شەو ئەسیرم

نە دۊدی ڕەشە دۊنم وە چەوم
نە دی هسارەێ مەنیە لە شەوم

نە ڕمەێ بڕنەو تێەێدن وە گووشم
نە شاقەێ کەوێ کەێدن مەدهووشم

جار جارێ ڕەێ بوو مەل بێ کەسێ
یا لە دۊرا تێەێ زڕ قۊ پەسێ

ئەوانیش گشتێ لەێرە ڕێوارن
یا لەێ وڵاتە مینگە نووارن

ساتێ نێەنیشن گووش بەن وە دەنگم
هەر شەو تا وە سوو منیش دلتەنگم

وێنەێ ێەێ پیرێ ێە سە خەم دامە
تا ڕووژ مەحشەر ئێ مەرزە جامە

✍ "جەلال کووهی"

🌸
🌿
🍁🍃
🍂☘🌸
🍃🌺🌼🍀🌿
🍀🌼🌸🍃🍂☘🌷🌺

چەنێ خاسە لە ئی دونیا کەسێ بووگ

لە ناو ئێ شار چووڵە چەو مەسێ بووگ

چەنێ خاسە ئڕاێ داخەیل هەر شەو

لە وێنەێ مەڵهەمێ گەرمی دەسێ بووگ

✍"جەلال کووهی"

٭٭ تەمۊرە ٭٭

تەمۊرە بژەن ئمشەو خەراوم
جوور کشتی ئەسیر گیژ گەرداۆم

تاسوو هامە دەس زەلان جەورەو
جووردار ۆەنێ لە بەرزی کەورەو

تەمۊرە بژەن ناڵەێ گیانمی
قرچەێ چخچێلەێ ناو میلکانمی

تەمۊرە بژن ڕاێ داخم ئمشەو
ڕاێ بێستۊن پڕ ئاخم ئمشەو

بژەن تا وەسوو ڕاێ کزەێ جەرگە
ڕاێ پیرە دار ڕازی وە مەرگە

بژەن ساز دڵ ناسازە لەێرە
جوور زەخم چەقێاێ دەم وازە لەێرە

بژەن دریژە شەوار تا وەسوو
بناڵ لە سووزەم تا وە ڕووژ نوو

نە دووس نە دڵ سووز نە دی کەسێ مەن
خەمێ هەم هاتەو گیانم بێ دەنگ سەن

شان دامە لە شان تەنیاێ دیواڕەو
دەس کیشم لە سەر زلف شەوارەو

قرچەێ گیانم تێەێ کوو لە بان کوو
ۆێنەێ پیرە دار لە بەرزی ئاسوو

تەمۊرە بژەن ژان ها خەێاڵم
ۆێنەێ پرۊسنەک شکێاێە باڵم

لەپ کوتێ هۊرم گیان کەنێ گیانم
بنووڕ هۊردەسە ئازای سقانم

لە قوڵ تیسەێ خەم تەنیام لەێ شارە
لیسک خوەر هاکوو؟ گشتێ شەوارە

کام دەس ۆاز بکەێ دەروەچەیل شەو؟
لە نوو بۊنیمن ئاسمان کەوو

ئێمە زندانی شەوق دووسیمن
کوشێاێ بێ نیشان زەوق دووسیمن

تەمۊرە نەمەن نە دەس و نە دووس
لە ئێ تەنیایە هەر تۆ لە لام بووس

بنووڕ وە قوڵپەێ ئەسرەیل چەوم
بنووڕ وە گرپەێ بڵۆزەێ تەوم

بنووڕ وەێ گیانە تا سوو بارمە
ۆێنەێ باێە قوش قوقو کارمە

بژەن لە داخم بژەن لە دەردم
بژەن لە سووزەێ زمسان سەردم

بژەن تەمۊرە تۆ زانی چۊنم
لە ناو هسارەیل شێۆەێ دووس دۊنم

وەرەو هەر جا کەم لە ئێ شەوارە
ترۊسکەێ چەۆێ لە دۊر دیارە

لە داخێ خەوم تاسوو حەرامە
سۊک زندان تێەریکی جامە

✍جەلال کووهی

👇👇👇👇👇👇👇👇👇👇

https://t.me/joinchat/AAAAAD4Om2zbHnNyeeQTUA

🌸
🌿
🍁🍃
🍂☘🌸
🍃🌺🌼🍀🌿
🍀🌼🌸🍃🍂☘🌷🌺

شەماڵ ساتێ بووس شەماڵ ساتێ بووس
شەماڵ قەسەمد دەم ۆە دیدەێ دووس

شەماڵ قەسەمد ۆه دیدەێ دووسم
تەنیاێ گیانم سەن تا ۆه کەێ بووسم

شماڵ قەسەمد ۆەدار وەنێ
وەترنگەێ کیەنی ناو تاش و کەنێ

وە کەپوو تەنیاێ بێ پا وە دەسێ
یا وە ڕێوار داێم بێ کەسێ

وە داڵ پیر باڵەیڵ شکیایێ
یا دار پیر وەلنگەێل ڕزیایێ

وە وەڵنگ وشک پاێ داڕ وەنێ
یا چۊزەێ نەوڕەس قۊلی دەروەنێ

وە سەونزی بەڕۊن ڕەێنی کەێ کوو
یا وە نازاری ڕەوز هشکەچوو

وه تلۊق خوەر وە سەێنی خەو
وە ناز خەیاڵ شکیاێ لە ناو چەو

وە زەردی چەوێر وە بڵێنی وەن
وە تێژی بژانگ وە پێچ سەروەن

وە بوو عەتر نان لە ساج و کوانێ
یا بوو بان ئەنوود له بان خانێ

وە ناز چەو مەس وه ڕەێنی شەو
وە عشوه وە شەوق نازاران له خەو

وە بەڕزی مانشت وە چاڵی ئەێۆان
وە دار سزێای بان سەرێوان

شەماڵ قەسەمد دەم وە سەردەوا
وە هشکی چاڵاو ۆه چروو تەنیا

وە پیری ئەڕجن وە سەڕدی زەلان
وە ژان تەنیاێ وە زیڕەێ مەلان

وە هشکی پۊش و وه زردی ئەسپەن
وە تەنیاێ دار بێ کەس سەرشەن

وە تێەریکی شەو وە هسارەێ سوو
وە ڕوژنای ڕووژ وەتەنیاێ کەپوو

وە کۊەو وە دەێشت وە باخ و وە دار
وه ئاخڵەێ مانگ لە دەێشتەێ شەوار

شەماڵ قەسەمد وە نەرمە واران
وەه چک چک ئاو ڵه زۆڵف داران

وە سەردی سووان وە دڵ تەنگی ئەور
وە کۊەێ مانشت کتاو دەورەێ گەور

وە بووسان وشک وه تەنیاێ چەرداخ
وەشەوق شەوار لە دەێشتەێ ئێڵاخ

وەو دار بەڕز ناو دوۆیرانه
یا وەو ئەنجیر باخ خورانه

یا وەو بڵالۊک بان بانکوڵه
یا وەو سیەمال ناو دەێشتەێ چووڵه

یا وەگۊج هشک یەێ پەل دارێ
یا وە خەت و خاڵ سەونزەێ نازارێ

شەماڵ قەسەمد وە داران دەێشت
ت بۊش وه دووسم تەنیای ڵەلیم نەێشت

تەنیاێ داڕزان پووس و سقانم
داێە قەپاڵا ته مام گیانم

له وێنەێ داوڵ مردم وە پاۆه
شەماڵ بۊش زڵفێ بخەێ وه لاۆه

بۊش ساتێ بووسێ لەولاێ دەۆاره
بوده مانگەشەو له ئێ شەۆاره

"جەڵاڵ کووهی "

👇👇👇👇👇👇👇👇👇👇

https://telegram.me/joinchat/A6D6XD4Om2y9DVSseeQTUA

🍁
🍃🍁
🍁🍂🍁
🍂🍁🍃🍁
🍁🍃🍁🍂🍁🍃